Djotodia aahidi kuwasamehe wanamgambo CAR

Rais Michel Djotodia wa Jamhuri ya Afrika ya Kati ameahidi kuwapa msamaha wanamgambo wa nchi hiyo endapo wataweka chini silaha zao. Rais Djotodia ambaye nchi yake inakabiliwa na machafuko ametangaza msimamo huo kama sehemu ya juhudi zake za kujaribu kuhitimisha machafuko ya kikaumu na kidini yanayoikabili nchi hiyo.

Rais Djotodia amesema kuwa, wanamgambo wa Kikristo wa Anti-Balaka wametuma ujumbe kwa serikali na kutangaza kwamba, wako tayari kuweka chini silaha zao lakini wanahofia usalama wao. Amesema, wanamgambo hao wametoa masharti ya kuweka chini silaha zao na mojawapo ni kujumuishwa serikalini.

Rais Djotodia amesema kwamba, serikali yake iko tayari kuwasamehe wanamgambo hao endapo wataaacha mapigano na kuweka chini silaha. Wakati huo huo, hali ya kibinadamu katika mji mkuu wa Jamhuri ya Afrika ya Kati, Bangui inaendelea kuripotiwa kuwa mbaya na baadhi ya ripoti zinasema kuwa, mji huo unakaribia kukumbwa na maafa ya kibinadamu.