Wandamana Ivory Coast kumuunga mkono Gbagbo

Mamia ya raia wa Ivory Coast wameandamana mjini Abidjan kumuunga mkono Rais wa zamani wa nchi hiyo, Laurent Gbagbo na kukosoa siasa zinazofuatwa na Mahakama ya Kimataifa ya Jinai ICC dhidi ya rais wao wa zamani. Maandamano hayo yalifanyika jana mjini Abidjan, mbele ya mahakama kuu ya nchi hiyo. Waandamanaji walikuwa wamevaa mashati meupe ambayo yalikuwa yameandikwa ‘Wahanga wa mgogoro wa uchaguzi’.

Aidha walibeba mabango yaliyokuwa yameandikwa ujumbe wa kukosoa siasa za upendeleo zinazofuatwa na Mahakama hiyo ya Jinai ya Kimataifa ya ICC, katika kuwaandama viongozi wa Afrika pekee. Laurent Gbagbo, Rais wa zamani wa Ivory Coast anatuhumiwa kutenda jinai dhidi ya binaadamu na anaendelea kushikiliwa katika korokoro za mahakama hiyo kwa miaka kadhaa sasa.