Mafuriko yazidi kuleta maafa Kenya; waliobaki bila makazi wafikia laki moja

Wakazi wa Kenya wakihama makazi yao baada ya kukumbwa na janga la mafuriko

Janga la Mafuriko nchini Kenya ambayo yamesababishwa na mvua kubwa zinazoendelea kunyesha katika maeneo mbalimbali ya nchi hiyo limezidi kusababisha maafa. Shirika la Msalaba Mwekundu la Kenya limetangaza kwamba, watu wasiopungua 58 wamefariki dunia katika kipindi cha majuma mawili yaliyopita pekee, kufuatia mafuriko hayo huku idadi ya watu waliobakia bila makazi ikifikia laki moja.
Baadhi ya maeneo ya makazi ya watu yameharibiwa vibaya na mafuriko, huku mamia ya hekari za mazao yakigeuka na kuwa mabwawa.
Imeelezwa kuwa, watu waliobakia bila makazi wanakabiliwa na hali mbaya ikiwemo ya ukosefu wa huduma muhimu kama chakula na maji safi ya kunywa. Katika baadhi ya maeneo nchini Kenya kuna mamia ya watoto wanashindwa kwenda shule kutokana na njia kuharibika na maji kuenea kila mahala.