Polisi na wapinzani wakabiliana Jamhuri ya Kidemokrasia ya Congo

Msemaji wa polisi ya Jamhuri ya Kidemokrasia ya Congo amesema kuwa, vikosi vya polisi vimekabiliana na wapinzani wa serikali na kusababnisha mtafaruku mkubwa.

Kanali Mwana Mputu ametangaza kuwa, makabaliano hayo yametokea katika mji mkuu Kinshasa kati ya vikosi vya polisi na wapinzani ambao ni wafuasi wa chama cha UDPS kinachoongozwa na Etienne Tshisekedi.

Augustin Kabuya Naibu msemaji wa chama cha mwanasiasa mkongwe wa DRC Etienne Tshisekedi cha UDPS amesema kuwa, vurugu kati ya polisi na wafuasi wa chama hicho zilianza baada ya mwanaharakati mmoja wa chama hicho kuuawa kwa kupigwa risasi na polisi.

Akizungumzia vurugu hizo, msemaji wa polisi ya Jamhuri ya Kidemokrasia ya Congo amesema kuwa, vikosi vyao vililazimika kutumia gesi ya kutoa machozi kuwatawanya wafuasi wa chama hicho.

 

Polisi wa Jamhuri ya Kidemokrasia ya Congo

Amesema, polisi katika jiji la Kinshasa imefanikiwa kurejesha amani na utulivu ingawa vurugu hizo zimesababisha hasara ikiwemo ya kuchomwa moto basi moja. 

Aidha amesema kuwa, askari aliyemfyatulia risasi na kumuua raia huyo tayari ametiwa mbaroni na atapandishwa kizimbani katika mahakama ya kijeshi.

Katika siku za hivi karibuni Jamhuri ya Kidemokrasia ya Congo imekuwa ikishuhudia maandamano ya mara kwa mara yanayoipinga serikali ya Rais Joseph Kabila.

 

Rais Joseph Kabila

Rais Kabila anayemaliza muhula wake wa uongozi mwaka huu, amekuwa akitoa wito mara kwa mara wa kufanyika mazungumzo ya kitaifa, wito ambao umekuwa ukipingwa na wapinzani.

Wapinzani wanasema kuwa, lengo la mazungumzo hayo ni njama ya serikali kutaka kuakhirisha uchaguzi wa rais wa Novemba mwaka huu na hivyo kuongeza muda wa Rais Kabila kuendelea kuweko madarakani.

 

Baadhi ya viongozi wa upinzani DRC

Kwa mujibu wa katiba ya Jamhuri ya Kidemokrasia ya Kongo, uchaguzi wa rais unapaswa kufanyika mwezi Novemba ambapo Rais Kabila hapaswi kuwania kiti hicho kwa muhula mwingine.