Khartoum yakubali pendekezo la AU juu ya Juba

Serikali ya Sudan imekubali pendekezo la Umoja wa Afrika kwa ajili ya kutatua tofauti zake na Sudan Kusini. Sudan imewasilisha rasmi suala hilo kwa Thabo Mbeki Rais wa zamani wa Afrika Kusini ambaye ni mpatanishi wa AU katika mazungumzo ya amani ya nchi mbili hizo na kumjulisha utayarifu wake wenye lengo la kutatua tofauti zilizopi kati ya pande mbili. Msemaji wa Wizara ya Mambo ya Nje ya Sudan AbubakarEl-Saddiq Muhammad Amin amesema, Thabo Mbeki amesisitiza ulazima wa kuainishwa eneo la mpakani  lisilokuwa la kijeshi kwa kipindi cha miezi sita kati ya nchi mbili hizo.

Aidha AU imepenekeza pia kuchunguza kadhia ya uungaji mkono wa Juba kwa makundi ya waasi ambapo Khartoum na Juba zimetakiwa kuwasilisha mapendekezo yao kwa umoja huo. Umoja wa Afrika pia, umezitaka nchi mbili, kusitisha uungaji mkono wowote kwa makundi ya waasi, ili kutoa fursa ya kutekelezwa makubaliano ya amani yaliyotiwa saini na viongozi wa nchi mbili mwaka jana huko mjini Addis Ababa, Ethiopia.