Baada ya miji ya al-Ramadi kukombolewa kutoka kwa Daesh, maelfu ya wakimbizi warejea makwao

Maelfu ya familia za Wairaq zimerejea makwao katika mkoa wa magharibi mwa nchi hiyo al-Anbar.

Ibrahim al-Awsaj, meya wa mji wa al-Ramadi katikati mwa mkoa wa al-Anbar, magharibi mwa Iraq, amesema kuwa kufuatia kurejea hali ya usalama kwa kipindi cha miezi saba iliyopita kwenye maeneo ya mkoa huo, maelfu ya familia zilizolazimika kuwa wakimbizi kipindi wanachama wa kundi la kigaidi na kitakfiri la Daesh walipodhibiti maeneo ya mji huo, sasa zimereja makwao.

Wakimbizi wa Iraq wakirejea makwao baada ya magaidi wa Daesh (ISIS) kufurushwa

Inafaa kukumbusha kuwa, jeshi la Iraq kwa kushirikiana na harakati za kujitolea za wananchi, zilianzisha operesheni ya kuukomboa mji wa al-Ramadi, mwishoni mwa mwaka uliopita wa 2015.

Wakati huo huo, jeshi la anga nchini Iraq, limeshambulia kwa akali ngome 20 za wanachama wa kundi la kigaidi na kitakfiri la Daesh katika mji wa Mosul wa mkoa wa Nainawa (Nineveh) kaskazini mwa Iraq. Hadi sasa habari kamili juu ya hasara waliyoipata magaidi hao bado haijawekwa wazi, ingawa inasadikiwa kuwa idadi kubwa ya wanchama wa genge hilo wameuawa na zana zao nyingi za kijeshi kuharibiwa.

Raia wa Iraq, wakijaribu kurejea makwao kwa tabu kubwa

Mashambulizi hayo ni utangulizi wa kuanza kwa operesheni kali za kuukomboa mji huo kutoka kwa magaidi hao wa Daesh au (ISIS). Mji wa Mosul ambao ndio ngome kuu ya wanachama wa kundi hilo linaloungwa mkono na utawala haramu wa Kizayuni wa Israel, ulidhibitiwa mwezi Juni mwaka 2014.