Wapiganaji Boko Haram wauawa huko Nigeria

Wapiganaji kadhaa wa kundi la Boko Haram wameuawa kufuatia mashambulio ya anga na ardhini ya jeshi la Nigeria kaskazini mashariki mwa nchi hiyo ya magharibi mwa Afrika. Kanali Muhammed Dole, msemaji wa divisheni ya 7 ya jeshi la Nigeria mjini Maiduguri amewaambia wana habari kwamba, idadi kubwa ya wapiganaji wa kundi la kigaidi la Boko Haram wameuawa baada ya kambi zao za siri kushambuliwa magharibi mwa mji wa Maiduguri.

Mashambulio ya jeshi la Nigeria yanatekelezwa baada ya kiongozi wa kundi hilo Abubakar Shekau kukiri hivi karibuni kwamba, kundi lake ndilo lililohusika na shambulio dhidi ya kambi moja ya kijeshi katika mji wa Maiduguri.

Rais Goodluck Jonathan wa Nigeria mwezi Mei mwaka huu alitangaza hali ya hatari katika majimbo ya Yoba, Borno na Adamawa kaskazini mwa nchi hiyo na kuliamuru jeshi kutekeleza operesheni za kuwasaka wanamgambo wa Boko Haram katika eneo hilo.  Kundi la Boko Haram limetangaza kuhusika na mashambulio mbalimbali ya umwagaji wa damu katika maeneo tofauti ya Nigeria tangu mwaka 2009.