Mahakama ya Zimbabwe: Uchaguzi ufanyike Julai 31

Mahakama ya Kilele nchini Zimbabwe imetupilia mbali ombi la Rais Robert Mugabe la kutaka tarehe ya uchaguzi isogezwe mbele na badala yake imesisitiza kwamba uchaguzi wa rais lazima ufanyike Julai 31 kama ilivyoamuliwa huko nyuma.

Jaji Mkuu wa Zimbabwe, Godfrey Chidyausiku amesema mahakama hiyo haina mamlaka ya kubadilisha uamuzi wake wa huko nyuma. Rasi Mugabe alikuwa ameomba tarehe hiyo ibadilishwe baada ya kushinikizwa na Jumuiya ya SADC pamoja na Waziri Mkuu wake, Morgan Tsvangirai.

Chama cha MDC kinachoongozwa na Tsvangirai kimesema uamuzi huo wa korti unavunja moyo lakini kimesisitiza kwamba, kitaanza kupanga mikakati ya kujiandaa kwa uchaguzi huo. Msemaji wa Tsvangirai, Luke Tamborinyoka amesema Waziri Mkuu amekubali kuheshimu maamuzi ya Mahakama ya Kilele na kwamba kitakachofuata ni kuanza kujiandaa kwa ajili ya uchaguzi.