Makamu wa Rais wa Sudan K kuelekea Khartoum

Makamu wa Rais wa Sudan Kusini Jumapili ya leo anatazamiwa kuelekea nchini Sudan kwa ajili ya mazungumzo yenye lengo la kutatua mgogoro wa mafuta baina ya nchi hizo mbili.

Uhusiano wa pande mbili hizo ulizorota mwezi huu pale Sudan iliposema itazuia mafuta ya Sudan Kusini kupita katika ardhi yake iwapo wakuu wa Juba hawatasitisha uungaji mkono wao kwa waasi wanaoipinga serikali ya Khartoum. Sudan Kusini inategemea mabomba ya Sudan kuuza mafuta yake katika masoko ya kimataifa.

Makamu wa Rais wa Sudan Kusini Riek Machar  anatazamiwa kufanya mazungumzo na Makamu wa Kwanza wa Rais wa Sudan Ali Osman Taha. Waziri wa Mafuta wa Sudan Kusini Stephen Dhieu Dau pia ataandamana na Machar mjini Khartoum. Mashirika ya mafuta ya China, India na Malaysia ambayo hununua mafuta ya Sudan Kusini yanapata hasara kubwa kutokana na mzozo baina ya nchi hizo mbili.