Maelfu waandamana kumpinga Morsi, Misri

Maelfu ya watu wenye hasira wamefanya maandamano makubwa katika maeneo mbalimbali ya Misri wakimtaka Rais Muhammad Morsi ajiuzulu.

Maelfu ya waandamanaji leo jioni wamekusanyika katika Medani ya Tahrir mjini Cairo kushinikiza Rais Morsi aondoke madarakani na kufanyike uchaguzi wa kabla ya wakati wake.

Huko mjini Alexandria, mji wa pili kwa ukubwa nchini Misri nako, maelfu ya waandamanaji wanaopinga serikali ya Cairo wamekusanyika kwenye medani kubwa za mji hiyo.

Mjini Port Said pia maelfu ya wapinzani wa serikali ya Misri wamefanya maandamano kutaka Rais Morsi ajiuzulu.

Maandamano hayo yameitishwa na wapinzani katika maadhimisho ya mwaka mmoja wa tangu Muhammad Morsi achaguliwe kuwa rais wa nchi hiyo ya kaskazini mwa Afrika.

Waandamanaji hao wanadai kuwa, Morsi ameshindwa kutekeleza malengo ya mapinduzi ya wananchi yaliyomng'oa madarakani dikteta Hosni Mubarak.

Katika upande mwingine, maelfu ya wafuasi wa Morsi nao wameandamana wakisema kuwa, rais huyo amechaguliwa na wananchi na kuwataka wapinzani waheshimu demokrasia.