UN yapongeza makubaliano ya Mali na Tuareg

Katibu Mkuu wa Umoja wa Mataifa, Ban Ki-moon amekaribisha makubaliano ya amani yaliyotiwa saini kati ya serikali ya Mali na waasi wa Tuareg hapo jana. Ban amesema pande mbili hizo zinafaa kuhakikisha kwamba makubaliano hayo yanatekelezwa kikamilifu. Katibu Mkuu wa UN amesema makubaliano hayo yataandaa mazingira ya kufanyika uchaguzi mkuu wa rais kwa njia ya amani na ameyataka makundi mengine ya waasi kufuata mfano huo ili Mali iweze kurudi katika hali yake ya zamani ya uthabiti na utulivu.
Ban Ki moon pia amewashukuru marais Blaise Compaoré wa Burkina Faso na Goodluck Jonathan wa Nigeria kwa juhudi zao za kuleta amani nchini Mali. Hapo jana, serikali ya Mali ilitiliana saini makubaliano ya amani na waasi wa Tuareg wanaopigania kujitenga eneo la Azawad, kaskazini mwa Mali na hivyo kuvifungulia njia vikosi vya serikali kurejea katika mji wa Kidal kabla ya kufanyika chaguzi mkuu mwezi Julai mwaka huu.